Commento e preghiera in friulano della Parola della XXXIII dom T.O. A

 O sin ducj un spetacul! Diu nus à fats, par che lu mostrini in chest mont. Deventa no stes e mostralu Lui e je la stesse robe!

Signôr,

tu nus âs fats tu

e ognun di nô al è un meracul

jessût de fantasie dal to amôr.

Dànus i tiei voi par viodisi

come che tu nus viodis tu

e cussì o rivarìn a savê

cui ch’o sin, ce ch’o valìn

e ce che o sin a fâ in chest mont.

Parcè che ognun di nô,

al è necessari par te,

dentri tal disen de tô storie,

e nol pues jessi rimplaçât di nissun.

Danus il coragjo di jessi nô stes

devant di chei altris,

di jessi come che tu nus vuelis tu

par che, midiant di nô,

e vadi indevant la tô creazion

e la tô storie, in chest mont;

cussì la nestre vite no sarà vivude dibant.

Judinus tu a no butâsi jù,

a no pierdi il treno de vite,

ma a vivile a plen e jentrâ te tô gjonde

che tu sâs dânus za ca jù,

prime di inneâsi in te là su!

AMEN (Mt 25,14-30)

Rizieri DE Tina, plevan di Nimis , vanzeli di domenie 19 Lui 2020

Domenie al il Vanzeli dal forment bon e de zizanie.

Nus dà tal voli il mâl, e chest al è il segnâl che nô o sin fats pal ben! O vin doi voi, par viodi no dome il mâl, ma ancje il ben ch’al è in chest mont e in nô. Marcant il mâl si lu slargje, marcant il ben si slargje chel.

Signôr,

o vivìn in chest mont,

ch’o si spietavin cui sa ce,

e al è une disperazion!

Nô ch’o voressin

jessi biei, bogns e brâfs,

o sin cemût ch’o sin.

Tu sarâs ancje stuf,

di sintînus a lagnâsi…

E tu nus clamis a no cjalâ,

dome il mâl par condanâlu,

ma a cjalâ il ben ch’al è

in nô stes, in chei altris e tal mont.

Par no cjalâ dome il mâl

ch’al è dentri e ator di nô,

e vivi cence sperance,

ti preìn cu lis peraulis

che tu nus âs insegnadis tu:

“Deliberinus dal mâl!”

Ispirinus tu a sierâ ogni discors

su nô stes e su chei altris

disint ch’o sin ducj tes tôs mans

e, s’o fevelìn di chest mont,

che tu sês tu l’unic paron de storie.

AMEN.

(Mt 13,24-43)