O vin bisugne di tacâ intôr des orelis e de bocje il cûr, par che, la nestre e sedi une ‘comunicazion’ là che si ricêf e si ufrìs ‘Vite!’
(Mc 7,31-37)
Signôr, no vin mai vût, in te storie, tancj mûts di comunicâ come vuê e forsit l’om nol è mai stât tant bessôl come in dì di vuê. Forsit no son mai stadis ditis tantis peraulis come cumò… E tropis no vano butadis vie, parcè ch’a sono çondaris? Tropis no sono strassadis, parcè ch’a no son scoltadis? Cetant che si fevele e ce pôc che si scolte!… E sì che tu tu nus as fatis dôs orelis e une bocje sole. Signôr, danus la grazie di vierzi la bocje par dî peraulis ch’a pandin il nestri cûr e di vê orelis ch’a sepin ricognossi e sintî lis peraulis ch’a vegnin dal cûr! E cussì, cuant ch’o si fevelarìn, o varìn gust di sintî che lis nestris animis a rivin a bussâsi AMEN.
